Тропарь, глас 4: Небесных воинств Архистратизи, молим вас присно мы, недостойнии, да вашими молитвами оградите нас кровом крил невещественныя вашея славы, сохраняюще ны, припадающия прилежно и вопиющия: от бед избавите ны, яко чиноначальницы Вышних сил.

Молитва: Святый и великий Архангеле Божий Михаиле, Неисповедимыя и Пресущественныя Троицы первый во Ангелех предстоятелю, рода же человеческаго приставниче и хранителю, сокрушивый с Воинствы своими главу прегордаго денницы на Небеси и всегда посрамляяй злобу его на земли! К тебе с верою прибегаем и тебе с любовию молимся: буди щит несокрушим и забрало твердо Святей Церкви и Православному Отечествию нашему, ограждая их молниеносным мечем твоим от всех враг видимых и невидимых. Буди вождь и соратай непобедим Христолюбивому воинству нашему, венчая его славою и победами над супостаты, да познают вси противляющияся нам, яко с нами Бог и святии Ангели Его. Не остави же, о Архангеле Божий, помощию и заступлением твоим и нас, прославляющих днесь святое имя твое: се бо, аще и многогрешни есмы, обаче не хощем в беззакониих наших погибнути, но еже обратиться ко Господу и оживленным быти от Него на дела благая. Озари убо ум наш Светом Божиим, да возможем разумети, что есть воля Божия о нас благая и совершенная, и ведети вся, яже подобает нам творити и яже презирати и оставляти. Укрепи благодатию Господнею слабую волю и немощное произволение наше, да утвердившеся в законе Господни, престанем прочее влаятися земными помыслы и похотьми плоти и ради тленнаго и земнаго вечная и небесная безумно забывати. Над всеми же сими испроси нам свыше дух истиннаго покаяния, нелицемерную печаль по Бозе и сокрушение о гресех наших, да остающее нам число дней временнаго жития нашего во изглаждение зол содеянных нами совершим. Егда же приближится час скончания нашего и свобождения от уз бреннаго сего телесе, не остави нас, Архангеле Божий, беззащитных противу духов злобы поднебесных, обыкших преграждати души человечестей восход в горняя; да, охраняеми тобою, безпреткновенне достигнем оных преславных селений райских, идеже несть печаль, ни воздыхание, но жизнь безконечная, и сподобимся узрети пресветлое лице Всеблагаго Господа и Владыки нашего и Тому воздати славу, со Отцем и Святым Духом, во веки веков. Аминь.